ఏకమై

సుఖఃదుఖాలు జీవన సాగర కెరటాలు
ఆటుపోట్లకి అల్లాడితే సాగదు పయనం
కనులు కనులతో కలిపి చేయూతమీయి
నా మనసుని ప్రేమించే ప్రయత్నంచేయి
సుఖఃదుఖాలను నీతోనే పంచుకుంటాను
ప్రేమసాక్షిగా నీ తోడునీడనై నేనుంటాను
నీవువేరని నేనువేరని కాక ఏకమై జీవిద్దాం
బాధైనా ఏదైనా వీడని బంధమై పయనిద్దాం

జీవంపోయి

ప్రేమే ప్రేమకి పరిభాషడిగింది
సాగరమే దాహం తీర్చమంది
వేడినార్పే గాలే ఆవిరివద్దంది
పెనవేసుకున్నబంధం పొమ్మంది
కనులతో తాకి ప్రేమకి జీవంపోయి
మనసులోస్మరించి అమరత్వానీయి

ఇలావద్దు

నా పగలు గడిచింది నీ అలుకలో
రేయి గడవకుంది నీ నిరీక్షణలో
నీ చిరునవ్వే నన్ను బ్రతికిస్తుంది
భ్రాంతి నుండి బయటపడేస్తుంది
ప్రేమించే మనసని క్షణాల్లో అనకు
ప్రేమించి నమ్మించి మోసం చేయకు.
బరువెక్కిన మనసుకు ఏ మందూవద్దు
నన్ను నాకు దూరంచేసి ప్రాణంపోయొద్దు.

ఎలామరి?

నిదురపో అంటావు
నిదుర రానీయవు..
ఆరగించమని అంటావు
నాలో ఆకల్ని హరించావు
మనసారా నవ్వమంటావు
మనసంతా నీవే నిండావు
కలలోనైనా రాలేదంటావు
ప్రేమతో నన్ను పిలవవు..

అదే జరిగింది

వద్దనుకునదే జరిగింది
పరిచయమనుకున్నదే
ప్రేమగా మారింది.
మనసుపడ్డాను ప్రేమించి
మనసుదోచాను నాదనుకుని
నిన్ను చూడనిదే కుదుటపడనంది
మనసు ఎవరెన్ని చెప్పిన వినకుంది
మేల్కొని నిదురించి నీకై చూచి
వేరే ధ్యాసే మదిని చేరకుంది.
నీవులేక గడవని పగటిని చూసి
రేయి కూడా మొండికేసింది.
నీవు దరిలేని లోకం నాకు నచ్చకుంది.

ఎందుకో

రాతిని రంజింపజేసే రాతిగంధమెందుకో
అలవోకగా తాకే అందని అందాలెందుకో
పక్వతలేని మనసుల ప్రేమపాసమెందుకో
పరువాల పొందులకై పడిగాపులెందుకో?

ఏలనో?

మూగవైన మనసు ఊసులు
గుడ్డిదైన ప్రేమకి ఎలా తెలిసునో?
మనసు మెచ్చిన పనులు
ఎవరు వలదన్నా చేస్తాం ఏలనో?

పట్టుదలతో

కెరటాలకి భయపడితే నావ తీరం చేరదు
ప్రయత్నిస్తే ప్రతిఫలం దక్కకుండాపోదు...

చీమ ధాన్యం నోటకరచి పైకి ఎగబ్రాకేవేళలో
పలుమార్లు పడిలేస్తుంది ఎక్కే ప్రయత్నంలో
అయినా నిబ్భరాన్ని సడలనివ్వదు ఏవేళలో
పట్టుదలతో సాధిస్తుంది విజయాన్ని చివరిలో.

ఈ జన్మలో

నన్నునేను మరచినా నిన్ను మరువను
కలలమాటున నిన్ను దాచుకుంటాను...
నీ ఊహనే శ్వాసగా మార్చుకున్నాను
జ్ఞాపకాలనీడగా నిన్ను తలచుకుంటాను...
భావాలఝరిగా నిన్ను మలచుకున్నాను
రాసే ప్రతి పదములో నీ రూపుగాంచెదను...
నీవు నా దానివి కాదన్నది నిజమైనను
మరుజన్మను మాత్రం నేనెలా నమ్ముతాను...
నీ చెలిమిలేని జీవితం నేనూహించలేను
ఈ జన్మలోనే నే నిన్నుచేరి అంతమయ్యేను...

దూరమైనావు

మరచిపోమంటావు మరపులోదాగి నీవు

నిదురపోనీయవు కలవరింతగామారి నీవు

ఆకలిని హరించి ఆరగించమంటావు నీవు

నా నవ్వుని దొంగిలించి నాకు దూరమై నీవు

మనసుదోచి నన్ను నర్తించు అన్నావు నీవు

నన్ను నాకు దూరం చేసినావు...ప్రియతమా!

తలవకు

మనసా మరి మరి తలవకు

తలచి మరింతగా విలపించకు

విలపించిన నీ కంటరాలు

ఎగసిపడిన జ్ఞాపకాలు....

నిను తలవక ఉండలేను

నాకునేనే దూరంకాలేను

ఆగదు ఆగమన్నా ప్రాయం

వీడిపోదు పొమ్మన్నా ప్రాణం....